نرخی نەوت ئەمڕۆ دابەزینی بەخۆیەوە بینی لەگەڵ جوڵە نێودەوڵەتییەکان بۆ هێورکردنەوەی بازاڕەکان، ئەمەش دوای ئەوەی وڵاتە گەورەکانی ئەوروپا و ژاپۆن ئامادەیی خۆیان بۆ دابینکردنی ئاسایشی گەشتیاری دەریایی لە گەروی هورمز ڕاگەیاند، هاوكات لەگەڵ هەنگاوە ئەگەرییەکانی ئەمریکا بۆ پاڵپشتیکردنی دابینکردنی نەوت.

وردودرشتی هەواڵ؛

گرێبەستە ئایندەییەکانی خاوی برێنت 1.71 دۆلار یان 1.54% دابەزین و گەیشتنە 106 دۆلار و 93 سەتن بۆ هەر بەرمیلێک تا کاتژمێر 4:20 بەکاتی گرینویچ، لە کاتێکدا نەوتی خاوی ڕۆژئاوای تەکساسی ئەمریکی 1.92 دۆلار یان 1.98% دابەزی و گەیشتە 93.63 دۆلار.

ئەم دابەزینە دوای لێدوانەکانی وەزیری گەنجینەی ئەمریکا، “سکۆت بێسێنت” هات، کە تێیدا ئاماژەی بە ئەگەری هەڵگرتنی سزا لەسەر ئەو نەوتە ئێرانییە کرد کە بارکراوەتە سەر تانکەرەکان، جگە لە ئەگەری ئازادکردنی بڕێکی زیاتری نەوتی خاو لە یەدەگی ستراتیژی ئەمریکا.

هەروەها بازاڕەکان بەهێزتر بون بە ڕاگەیاندنی بریتانیا، فرەنسا، ئەڵمانیا، ئیتاڵیا، هۆڵەندا و ژاپۆن بۆ ئامادەییان بە مەبەستی بەشداریکردن لە دەستەبەرکردنی تێپەڕبونی سەلامەت بەناو گەروی هورمزدا، کە نزیکەی 20%ـی دابینکردنی وزەی جیهانی پێدا تێپەڕ دەبێت.

زانیاری پەیوەندیدار؛

سەرەڕای ئەم دابەزینە، خاوی برێنت بەرەو تۆمارکردنی دەستکەوتی هەفتانەی زیاتر لە 4% دەچێت، کە پاڵپشت کراوە بە هێرشەکانی ئێران بۆ سەر دامەزراوەکانی وزە لە کەنداو و ئەو پەککەوتنەی لە بەرهەمهێناندا لێی کەوتەوە.

لە بەرامبەردا، چاوەڕوان دەکرێت نەوتی خاوی ڕۆژئاوای تەکساس یەکەم دابەزینی هەفتانەی خۆی لە ماوەی پێنج هەفتەدا تۆمار بکات، لەگەڵ فراوانبونی جیاوازی نرخ لەگەڵ برێنت بۆ بەرزترین ئاست لە ماوەی 11 ساڵدا.

پاشخانی هەواڵ؛

ئەوە لەكاتێكدایە كە دۆناڵد ترەمپ سەرۆکی ئەمریکا ئاماژەی بەوە کرد کە داوای لە سەرۆک وەزیرانی ئیسرائیل، “بنیامین ناتانیاهۆ” کردوە جارێکی دیکە ژێرخانی وزەی ئێران نەکاتە ئامانج، لە هەنگاوێکدا کە ئامانج لێی کۆنترۆڵکردنی پەرەسەندنەکانە.